Elliði

2004-09-21T01:00:00.000+02:00

Vertíðin í hnotskurn...
Nú er vertíðinni lokið þetta árið, kominn tími til þess að gera upp árið og reyna komast til botns í hinum ýmsu málum. Elliði mun hér á eftir greina frammistöðu liðsins, snerta á hinum ýmsu flötum og reyna að greina kjarnann í frammistöðu lisins. Hann mun styðja mál sitt með tölfræði og rökstyðja mál sitt eftir bestu getu. Elliði hvetur alla til að kommenta á greinina, skapa hér málefnalega umræðu en vonast því að menn rökstyðji mál sitt.

Síðastliðið haust stóð félagið á nokkrum krossgötum, frammistaða félagsins hafði ollið vonbrigðum og því góður tímapunktur til þess að stokka upp spilin og fara inn í nýtt keppnistímabil með nýjar áherslur. Skipt var um þjálfara, fengnir nýjir leikmenn til félagsins og bjartsýni félagsmanna óx með hverri vikunni. Liðið byrjaði vel, 17 stig eftir 7 umferðir og titillinn í augsýn. Þá kom að slæma kaflanum, 3 stig í 6 leikjum en ekki var nótt úti enn. Liðið endaði tímabilið með 9 stigum í síðustu 5 umferðunum sem getur nú alveg talist vera ágætt. Sem sagt keppnistímabilið 2004 var svo sannarlega kaflaskipt...hæðir jafnt sem lægðir.

Þegar greind eru stigin eftir því hver mótherjinn var þá náðum við 72% þeirra stiga sem í boði voru á móti liðunum í 8-10 sæti, 61% á móti liðunum í 5-7 sæti en aðeins 28% á móti liðunum í 1-3 sæti...það má því segja að liðið hafi ekki komið vel út úr þessum svokölluðu úrslitaleikjum...má kannski að segja að sjálfstraustið hafi ekki verið til staðar og liðið brotnað þegar síst skildi.

Mikið var rætt um það síðastliðið haust hvað félagið ætti mikið af efnilegum leikmönnum sem myndu nú fá fullt af tækifærum, springa út og framtíðin væri svo sannarlega björt. Þessu var Elliði sammála þessu og hlakkaði svo sannarlega til að sjá útsprungnu blómin á iðagrænum Fylkisvellinum. Elliði skilgreinir ungu leikmennina sem Albert, Kristján, Ragnar, Kjartan Breiðdal og Eyjólf...telur ekki Bjarna með því það voru ekki miklar líkur á því að hann myndi ekki spila hverja einustu mínútu. Þegar Elliði skoðar tölfræði ungu leikmannanna þá kemur nú ljós að þeir fengu nú ekkert svakalega mörg tækifæri. Kristján spilaði 845 mínútur, Eyjólfur spilaði 630 mínútur, Kjartan Breiðdal spilaði 231 mínútur, Albert 166 mínútur og Ragnar spilaði 117 mínútur...sem sagt þeir spiluðu 20% af mögulegum mínútum og ekki getur það nú talist mikið. Kjartan Breiðdal kom fjórum sinnum við sögu, Albert fjórum sinnum og Ragnar þrisvar sinnum...ekki er nú hægt að segja að þessir leikmenn hafi fengið einhver stórkostleg tækifæri á þessu keppnistímabili. Hinir ungu leikmenn félagsins byrjuðu samtals 22 sinnum inná á þessu keppnistímabil og voru 13 sinnum teknir út af þegar þeir byrjuðu...eða í 59% tilvika.

Elliði er á þeirri skoðun að það sé ekki nóg að gefa ungu leikmönnunum fáein tækifæri heldur þurfa þeir traust frá þjálfara, eldri leikmönnum, stjórn og að sjálfsögðu stuðningsmönnum...þetta hefur skort að mati Elliða.

Elliði komst líka að því að þeir ellefu leikmenn sem mest spiluðu þetta keppnistímabilið spiluðu samtals 80% af hverjum einasta leik að meðaltali...skemmtileg staðreynd en í sjálfu sér ekkert óvenjulegt.

Önnur staðreynd er sú að í öllum leikjum liðsins nema einum skipti þjálfarinn inn á þremur leikmönnum og setti leikmennina oftast inn á þegar 20-30 mínútur voru eftir af leikjunum. Þorbjörn Atli kom 12 sinnum inn á, Eyjó kom 7 sinnum og Óli Palli kom 6 sinnum...skiptingar þessara manna voru 49% af heildar innáskiptingum sumarsins. Björgólfur var tekinn 11 sinnum af leikvelli, Sævar 6 sinnum og Kristján 5 sinnum...skiptingar þessara þriggja leikmanna voru 43% af innáskiptingum sumarsins.

Svona er nú það...

Elliði telur minnkandi aðsókn vera mjög alvarlegan hlut, aðsóknin hefur ekki verið svona lág síðan félagið spilaði í 1.deild árið 1999. Meðaláhorfendafjöldi á heimaleiki sumarsins var 1104, árið 2003 var hann 1478 en mest hefur hann verið 1610 að meðaltali á leik keppnistímabilið 2001. Það má vel vera að einhverjar tilfallandi ástæður séu fyrir þessari lágu aðsókn, svo sem Evrópukeppni landsliða og slæmir leikdagar, en það er samt ekki aðalmálið...liðið hefur bara verið að spila hundleiðinlega knattspyrnu og hananú!!!!

Ennfremur vill Elliði bera saman þá sóknarmenn sem mest spiluðu fyrir liðið á þessu keppnistímabili...þeir eru Björgólfur, Sævar og Þorbjörn Atli. Björgólfur kom við sögu í 14 leikjum og skoraði 7 mörk sem verður að teljast nokkuð ásættanlegt. Ennfremur má nefna það að Björgólfur spilaði 1068 mínútur og kom því mark frá honum með 153 mínútna millibili. Sævar skoraði aftur á móti 4 mörk, kom við sögu í 17 leikjum og kom mark frá honum með 351 mínútna millibili. Síðast en ekki síst skoraði Þorbjörn Atli 3 mörk, kom við sögu í 14 leikjum en aftur á móti lék hann einungis í 431 mínútur og kom því mark frá honum með 144 mínútna millibili. Svo dæmir hver fyrir sig...

Elliða fannst það svolítið merkilegt að skoða heildarafrakstur sumarsins samanborið við keppnistímabilið 2003. Liðið endaði mótið í sama sæti, fékk jafnmörg stig en markamunurinn var einu marki í plús frá árinu á undan. Síðastliðið haust voru háværar raddir um það að Fylkisliðið skoraði ekki nógu mikið af mörkum, liðið hefði engar lausnir og það þyrfti að stokka upp leikskipulagið. Á þessu tímabili skoraði liðið hvorki fleiri en færri en þremur mörkum færra en árinu áður og því ekki mikið gerst í þeim markamálum. Aftur á móti fékk liðið á sig fjórum mörkum færra þetta árið þökk sé sterkri vörn og frábærum markverði. Það er samt einhvern veginn svo groundog day fílingur yfir þessu öllu saman...sama sagan á hverju ári.

Elliði telur að félagið standi nákvæmlega í sömu sporum eftir þetta keppnistímabil og það gerði fyrir akkúrat einu ári síðan. Félagið er að ljúka alls ekki nógu góðu keppnistímabili eins og árið á undan, færri mörk skoruð, jafnmörg stig, sterkan leikmannahóp og efnilega leikmenn...það er eins og félagið hafi gjörsamlega staðnað og ekkert hafi gerst...hvorki til góðs eða ills.

2004-06-15T14:40:00.000+02:00

Allt að gerast...
Það hefur margt jákvætt átt sér stað á undanförnum dögum hjá Fylkismönnum, ætlar Elliði að stikla á stóru um þessi afrek og óskar hann öllum þeim að þessum afrekum komu til hamingju:

Meistaraflokkur kvenna unnu sinn fyrsta leik í Íslandsmótinu, frábært hjá stelpunum og óskar Elliði þeim til hamingju.

Meistaraflokkur karla situr á toppi Landsbankadeildarinnar eftir góða sigra á móti Grindavík og Keflavík...Elliði mun ekki ekki minnast einu orði á leikinn á móti Fram enda sá hann ekki leikinn. Þetta er góð byrjun á tímabilinu og er Elliði bjartsýnn á framhaldið.

Bjarni markmaður heldur áfram að spila eins og sá sem valdið hefur og mun gera það áfram. Aðdáendaklúbburinn Þórður óskar Bjarna til hamingju sem spilamennskuna.

Ólafur Ingi Skúlason hefur verið boðinn nýr samningur við stórveldið Arsenal, það er mikil viðurkenning fyrir hann og kemur það svo sannarlega ekki Elliða á óvart enda um snilling á ferð...lifi Óli Skúla.

Fylkismenn fengu góðan liðstyrk um daginn þegar Kristinn Tómasson gekk til félagsins á nýjan leik. Það er frábært að Stinni Stuð sé kominn til Fylkis á nýjan leik...

Fylkismenn hafa tekið í notkun nýjan gervigrasvöll og mun hann verða félaginu mikil lyftistöng á komandi misserum. Elliði á samt erfitt með að sætta sig við það að gamli malarvöllurinn sé kominn undir græna torfu, á góðar minningar frá þeim velli og mun geyma þær í hjarta sínu.

Gylfi Einarsson er byrjaður að skora og skora með liði sínu Lilleström og eru það góðar fréttir af frábærum fótboltamanni.

Sem sagt þetta hafa verið viðburðaríkir dagar hjá félaginu...sem er gott

Leikur kvöldsins...
Um daginn fóru hinir íslensku víkingar á Old Trafford, spiluðu slakan leik og voru teknir í bakaríið í orðsins fyllstu, í leik sem seint mun endurtaka sig. Í kvöld munu aðrir víkingar fara upp í Árbæ, ekki hafa erindi sem erfiði og mun þessi leikur fara 5-0 fyrir Fylki. Það hefur oft verið þannig á undanförnum árum að Fylkisliðið hefur dottið í gírinn á heimavelli, unnið stóra sigra og gjörsamlega valtað yfir andstæðinginn...þannig verður það í kvöld

2004-05-28T00:39:00.000+02:00

Stundum er gott að spár gangi ekki eftir...
Elliði hafði einhvern veginn ekki góða tilfinningu fyrir leiknum í gærkvöldi, yndislegt að spá hans gekk ekki eftir og þrjú mikilvæg stig komin í Árbæinn. Aftur á móti gekk eftir sú spá Elliða að Sævar myndi skora..enda hefur Elliði tröllatrú á Sævari fyrir þetta keppnistímabil.

Elliði er í skýjunum yfir því að Bjarni hélt hreinu í öðrum leiknum í röð, þetta mun gefa honum mikið sjálfstraust sem mun nýtast liðinu til góðs í komandi leikjum.

Ennfremur er Elliði ánægður með að Þorbjörn Atli náði að skora á móti sínu gamla félagi og sitt annað mark fyrir stórveldið úr Árbænum.

Þetta er frábær byrjun á mótinu og hefur hún verið vonum framar, mikilvæg stig eru í húsi og ekki annað hægt en að vera bjartsýnn á framhaldið.

Elliði óskar Fylkismönnum til hamingju með stórglæsilegan sigur...lifi stórveldið.

2004-05-27T01:22:00.000+02:00

Elliði spáir í leik Fylkis og Grindavíkur...
Nú er komið að því að Fylkisliðið þurfi að spila í hinni skemmtilegu hafgolu í Grindavík. Þetta er erfiður útivöllur en aftur á móti útivöllur þar sem Fylki hefur gengið ágætlega á undanförnum árum. Það er alveg á hreinu að Fylkisliðið er mun sterkara á pappírunum og eru þrjú stig í augsýn ef liðið spilar samkvæmt getu. Elliði er þrátt fyrir það ekki mjög bjartsýnn fyrir viðureignina og spáir 1-1 jafntefli. Grindarvíkurliðið hefur sýnt það í undanförnum leikjum að það spilar sterka vörn, með Kekic sem besta mann, og erfitt getur verið fyrir Fylkisliðið að brjóta hana á bak aftur. Elliði spáir því að Sævar skori mark Fylkis í fyrri hálfleik en Grétar Hjartarson jafni leikinn í þeim seinni.

Elliði vonar svo sannarlega að spá hans gangi ekki eftir, Fylkisliðið nái sigri í kvöld og komi með þrjú stig í Árbæinn.

Elliði skorar á Fylkismenn og aðra knattspyrnuunnendur að spá fyrir um úrslit leiksins, sem komment hér fyrir neðan. Kúrbíturinn mun aðeins spá fyrir um úrslit leikja Fylkis því honum er svo sannarlega sama um hvernig hinir leikrinar fara. Elliða hefur aldrei fundist gáfulegt að spá mikið í leiki annarra liða í deildinni, betra að einbeita sér að eigin liði og ekki vera eyða orku í neitt annað.

Lifi stórveldið...

2004-05-26T22:45:00.000+02:00

Elliði grætur af gleði...
Elliði er hamingjusamur maður í dag enda alltaf gaman að láta FH-inga fara tómhenta út Árbænum. Þetta voru mikilvæg stig fyrir framhaldið, sjálfstraustið mun vaxa með hverjum sigurleiknum og framhaldið lítur vel út.

Í fyrri hálfleik í leiknum á móti FH, þegar lítið var að gerast í leik Fylkismanna, þá kom Elliða í hug eftirfarandi brandari:

Þrátt fyrir það að Elliði sé getspakur maður, hefur oft rétt fyrir sér þá gekk ekki spáin hans um leikinn á móti FH í gær alveg upp. Elliði hefur áhyggjur af því að leikmenn taki spá hans of alvarlega, slappi bara af og halda að leikurinn vinnist af sjálfum sér...bara af því að Elliði sagði það. Leikmenn Fylkis verða að fara breyta þessu meingallaða hugafari, henda því út í hafsauga og fara út í hvern leik til þess að vinna hann upp eigin spýtur. Það er ekki nóg að fara inn á völlinn og halda að hlutirnir komi að sjálfum sér...bara út af því að Elliði sagði það.

Svo í seinni hálfleik tóku Fylkismenn sig saman í andlitinu, spiluðu miklu betur og uppskáru þrjú mikilvæg stig. Þrátt fyrir að Fylkismenn hafi eyðilagt fyrir Elliða góðan brandara þá er hann í skýjunum með stigin þrjú.

Áhorfendur Fylkis voru hljóðir á vellinum í gær...Elliði gengur út frá því að Djöflagengið, eins og það leggur sig, hafi verið að útskrifast með stúdentspróf í gær og ekki komist á völlinn af þeim sökum. Elliði vill óska þeim til hamingju með áfangann og vonast eftir að heyra meira í þeim í næsta leik.

Elliði vill óska Þorbirni Atla Sveinssyni til hamingju með fyrsta markið fyrir Fylki og svo sannarlega var þetta mikilvægt mark.

Í öðrum leiknum í röð tókst Bjarna að redda okkur Fylkismönnum stigum með stórkostlegri markvörslu. Þetta er eitthvað sem góður markvörður þarf að bera...að verja stundum þessi óverjandi skot. Aðdáendaklúbburinn Þórður, hér í Mílanóborg, óskar Bjarna til hamingju með stórkostlegan leik.

Elliði er ánægður með byrjunina, hlakkar til næstu leikja og er bjartsýnn fyrir hönd félagsins

Lifi Fylkir...að eilífu

2004-05-19T01:41:00.000+02:00

Það er líf eftir jafntefli...
Vonbrigði Elliða voru mikil þegar Skagamenn náðu að jafna leikinn þegar fjórar mínútur voru komnar fram yfir venjulegan leiktíma því Elliði var virkilega farinn að gæla við það að ná þremur stigum í hús úr þessum fyrsta leik íslandsmótsins. Samkvæmt útvarpslýsingunni voru Fylkismenn betri aðillinn fyrri hálfleik en Skagamenn ívið sterkari í þeim síðari...enda með skagarokið og skagarigninguna í bakið. Þegar leikurinn er skoðaður í heild sinni þá voru úrslitin kannski sanngjörn...að minnsta kosti þegar litið er á þá staðreynd að Bjarni markmaður var besti maður vallarins að mati Fréttablaðsins.

Elliði var svo sannarlega sannspár þennan sunnudaginn því hann spáði rétt fyrir um úrslit þessa leiks og hver myndi skora fyrir Fylki...Elliði talaði við Sævar Þór kvöldið fyrir leikinn, tjáði honum spá sína og því hefur Elliði vitni að þessari spá sinni. Elliði hefur hug á því að spá rétt fyrir alla leiki sumarsins og tala við Sævar kvöldið fyrir hvern einasta leik...þá mun Fylkir enda mótið á farsælan hátt og Sævar verða markakóngur mótsins.

Elliði er í skýjunum yfir frammistöðu Bjarna Þórðar Halldórssonar í sínum fyrsta alvöru leik sem leik sem aðalmarkvörður Fylkis. Bjarni greip vel inn í leikinn og varði oft á tíðum frábærlega. Elliði hefur ákveðið að stofna aðdáendaklúbb Bjarna Þórðar hér í Mílanó og er það örugglega í fyrsta sinn sem íslenskur leikmaður á sinn eigin aðdáendaklúbb á Ítalíu nema að Albert Guðmundson heitinn hafi átt einn slíkan hér á árum áður. Aðdáendaklúbburinn mun heita Þórður og munu félagsmenn hittast yfir glasi af rauðvíni einu sinni í viku á hinum geysivinsæla Fresco Bar. Þar verður Bjarni Þórður aðal umræðuefnið, dreift verður barmmerkjum og að sjálfsögðu verður keppni um það hver sé líkastur goðinu. Þeir sem vilja fá inngöngu í klúbbinn eru beðnir um skila inn umsókn sem komment hér fyrir neðan og þess má geta að farið verður með allar umsóknir sem trúnaðarmál.

Elliði vill hér með óska Bjarna til hamingju með frammistöðuna í fyrsta leiknum, hann stóð sig frábærlega og hefur Elliði trú á því að þetta sé einungis byrjunin á glæsilegu kepppnistímabili. Á undanförnum vikum hefur Elliði farið fögrum orðum um hæfileika Bjarna sem markmanns og vill Elliði koma því fram að Bjarni uppfyllti svo sannarlega allar væntingar Elliða.

Elliði vill hrósa forsvarsmönnum Fylkis fyrir að auglýsa eftir fólki í ákveðna starfshópa og nefndir á vegum Fylkis á heimasíðu félagsins. Þegar Elliði las fyrirsögnina þá hélt hann að einungis væri að auglýsa eftir sjálfboðaliðum til þess að vinna á heimaleikjum o.s.frv. Það var svo sannarlega rangt hjá Elliða því þarna var um að ræða allar þær nefndir sem vinna innan félgsins, t.d. fjáröflunarnefnd, herrakvöldsnefnd og meistarflokksráð. Þetta er frábært hjá Fylki að auglýsa þessar nefndir á heimasíðu félagsins og gefa þar með öllum sem hafa áhuga tækifæri til þess að taka þátt. Sérstaklega er Elliði ánægður með markaðs- og útgáfunefndina sem þarna er auglýst og vonar Elliði eftir að hæft fólk ráðist til þeirra starfa.

Ennfremur vill Elliði hrósa félaginu fyrir mjög svo batnandi heimasíðu, fréttir eru orðnar mjög reglulegar og loksins getur maður virkilega treyst á skjótan fréttaflutning. Elliði vill koma fram með þá hugmynd að þeir sem sjá um heimasíðuna hói saman í nokkra skemtilega penna, fái þá til þess að skrifa pistla sem birtast á heimasíðunni kannski tvisvar í viku. Það eru margir skemmtilegir pennar innan félagsins sem væru örugglega til í að taka þátt, t.d. Andri Snær Magnason, Dagur Eggertsson, Birna Anna Björnsdóttir, Steinar Bragi Guðmundsson o.fl. Elliði telur að þetta gæti verið skemmtilegt, þetta urðu ólíkir pennar sem myndu koma með fjölbreytta vinkla á félagið.

Lifi Fylkir...að eilífu